原來仲有人keep住呢張證!計落張證都真係有十九幾年喇! 

話說喺好耐好耐以前,西環有個Mini-Z車場,場內條賽道都有張乒乓波枱咁大,仲有三幾個小食店格式嘅面壁pit位.......呢個爛鬼車場就係rcMart嘅前身同發源地!當年攪呢個車場嘅目的只係為咗成班朋友一齊玩 Mini-Z! 當時我仲經營緊同模型完全唔相關嘅行業,完全冇諗過可以演變成一項事業。

車場生意淡薄,方圓百里嘅烏蠅都比我地拍死哂,所以就試下攪個網站出嚟散吓貨,點知真係有外國客人落單。就係咁 第一代嘅 遙控車網店就出現咗,當時我地.主要銷售 Kyosho Mini-Z 系列產品,包括各大品牌嘅改裝件。又過咗一段時間,來自世界各地嘅訂單開始越嚟越多,我地正職收工後就落去車場用各種理由將玩緊車嘅人驅散,落閘密密包貨。仲記得當年我地同D學生客講過 : "小朋友,今日唔駛比場租錢喇,快D返屋企溫書啦!!" 依家諗返都覺得好好笑。再後嚟,我地索性門都唔開,用舖頭作為 office 同貨倉 去經營網上生意。

喺西環一段短時間,我地就搬離西環進註旺角商廈,專心去經營網上遙控車! 見返下圖張會員證,都有D認佢唔到,不境都係十九年前嘅事喇! 再次多謝呢位老客戶仲 keep 住張證比返D回憶我!